مش عارفة ايه خلانى عايزة اكتب النهاردة عايزة اقول حاجات رغم تجاربى المأساوية مع البلوجات سابقا التى تنهى دائما بعمل بروفيل أو التفكير فى اسم ينتهى الموضوع بده باحباط شديد نتيجة تواضع قدرتى الكتابية مقارنة مع ما أعتقده بموهبتى التى تتجاوز نجيب محفوظ على باولو كويلو على ارنست همينجواى مضروبين فى الخلاط
كثيراً ما أرى اشياء فى الكلية أو فى الشارع أو فى الحلم و ابقى عايزة اقول
عايزة أحكى أفضفض و الى حطق من جنابى - بيئة أوى عارفة- زى حالة برستو مسنية لحظة انفجار
مش عارفة يمكن الأخبار الى جاية من فليسطين مذبحة جديدة، قديمة مش كده؟ يمكن صوت منير فى الخلفية
"ابكى لو فى عينى دموع
اضحكى لما أكون فرحان
احضنينى لو الغرام ممنوع
حسى بيا و بعينيا
كلى شوق و حنان"
عارف احساس الفضفضة اللى يخليك تضرب دماغك فى الحيطة و مالوش حل غير انك تحكى طب لو ما ينفش احكى لو احساسى بتفاهة مشاعرى تركنى فى وحدة موجعة تقتل اى أمل فى البوح. يا الله ما أحلى لكلمة"البوح" كان من المفروض أن تكون عنوان البلوج
مش عارفة ليه حبيت اسميه هيستيريا حسيت مفيش حاجة بتعبر عنى و عن البلد كلها غير الكلمة دىHysteria جاية من hyster يعنى رحم مما يفسرها بأنها ست يعنى - أكيد راجل الى قال كده- أو بأنها محاولة منا للرجوع لرحم الأم حيث كنا مأنتخين تماما مدفى واكل شارب نايم و لا فيه دوشة و لا وجع دماغ .
ايه اللى قلب الموضوعلمى كده معلش اعذرونى بقة طب بتاكل دماغ الواحد المهم القصد أننا كلنا بقينا فى هيستيريا تامة واحد يزنَق عليك و بعدين يشتمك حد يدوس على رجلك و بعدين يزغرلك الناس بتتخانق مش عارفين ليه. كل حاجة عندنا أوفر الأكل الشرب الكلام التليفزيون أما أنا فلا أدرى ما حدث لى فقدت بوصلتى هويتى أنظر فى لمرآة لا أدرى أهذا أنا أم حطام ما كنته أحس بالعجْز و العجَز معاً
مش لاقية سبب للكآبة اللى جواية احساس بانى نفسى فى حبة شجن مش غم ,هبل صح؟
افهمنى الشجن شىء جميل غير الاكتئاب هو اللحظة اللى بتحسسك انك عايش لسة بتحس و تندهش-مرة تانية ابقى اتكلم عن الدهشة- الاحساس اللى بيخليك تتعوج كده لاحساسك برقيك كآدمى
نفسى أحسنى و اصاحبنى تانى أصلى خاصمتنى من زمان أوى
أكبر تعبير عن حالتى دلوقتى هو قصيدة على سلامة " حاجة كده" لو مش عارفها بجد دوَّر عليها
نفسى فى ايس كريم من بتا عزة احنا صحيح فى عز التلج بس دى أحلى حاجة أساسا
نفسى اقعد مع نفسى و اسمعها احكيلها أنا عارفة ان محدش حيقرى البلوج ده و اساسا مش هدفى انه
يتقرى
نفسى ارجع اصدق فى نفسى انى أقدر و انى صح و انى لما عايزة حعمل
نفسى فعلا اكتب و ارجع اقرا و اسمع زى زمان
نفسى ألقانى تانى.......
