لو لم أكن مصريا لوددت أن أكون........؟
سؤال واجهنى فى كل حتة الأيام اللى فاتت
كل ما افتح جرنان
النت
فى البيت
و الشارع
و أنا بتفرج على انجازاتنا فى الاوليمبياد
و أنا بسمع عن نظيف و هو بيقول لتامر انت قدوة للشباب المصرى
أحيانا توجد خيارات و أحيانا
متروكة لى للتقرير
أعدت أفكر
سحر الجعارة- اللى استوحيت منها العنوان - قالت كتير من اللى كنت عايزة اقوله فى المصرى اليوم
افزعنى ما كتبه مجدى الجلاد
تصريحات امهات الغرقى هربا من مصر قهرتنى
ليس الفقر وحده
و لا الظلم
ليس الفساد
و لا انعدام التكافؤ
ايه اللى قتل فينا الانتماء؟
كلمة غريبة صح
قديمة زى شعارات الاشتراكية
و الوحدة العربية
ما طول عمرنا فقراء و مظلومين
من ايام الفراعنة
قلى كدة امتى المصريين كانوا عايسيين فى رخاء
ما هى طول عمرها ضنك بس بنحبها
و الأرض عرض
و عواد باع أرضه باع طوله و عرضه
طب و الله حاجة هبلة بس و أنا صغيرة ما كنتش بفهم ليه حد يغنى لبلده لو مش مصرى
يعنى ايه العظمة يعنى فى كونى قطرى و لا استونى-من استونيا- و لا قرغيزى- قرغيزيا دى تبع كانت تبع السوفييت وسط اسيا على ايدك اليمين -
أو حتى امريكانى
طالما مش من مصر يبقى ما فيش حاجة يغنيلها
عامة بعد كدة كبرت و عقلت بس لسة شفونية و بحبها
و ببكى لما بسمع جاهين بيقول
"بحبها و هى مالكة الأرض شرق و غرب
و أحبها
و هى مرمية جريحة حرب"
مع انها ما ملكتش الأرض غير أيام تحتمش الثالث
عامة مش عارفة ايه حلها و هل فعلا لو حاربنا مش حيروح حد يدافع
هل لو لم أكن مصري كانت حتبقى فل أوى؟
السؤال اجبارى و مش عارفة الاجابة
ليست هناك تعليقات:
إرسال تعليق